ఆర్టీసీ సమ్మెపై ప్రభుత్వం కౌంటర్.. హైకోర్టు అసంతృప్తి....!

ఆర్టీసీ సమ్మెపై హైకోర్టులో దాఖలైన పలు పిటిషన్లు గురువారం మరోసారి విచారణకు వచ్చాయి. ఈ సందర్భంగా తెలంగాణ ప్రభుత్వం దాఖలుచేసిన కౌంటర్‌పై హైకోర్టు అసంతృప్తి వ్యక్తం చేసింది.

• తెలంగాణ ఆర్టీసీ కార్మికుల సమ్మెను సవాల్ చేస్తూ దాఖలైన ప్రజాప్రయోజన వ్యాజ్యంపై గురువారం హైకోర్టు విచారణ ప్రారంభించింది.

• ఆర్టీసీ కార్మికుల తరఫున తెలంగాణ జనసమితి నేత కోదండరాం, జేఏసీ నేతలు హాజరయ్యారు.

• తదుపరి విచారణను అక్టోబరు 15కు వాయిదా వేసింది

• ఈ నెల 19వ తేదీ వరకు విద్యా సంస్థలకు దసరా సెలవులను పొడిగిస్తూ సర్కార్ నిర్ణయం తీసుకుంది.

ఈ సందర్భంగా తెలంగాణ తెలంగాణ ప్రభుత్వం, ఆర్టీసీ యాజమాన్యం కౌంటర్ దాఖలు చేశారు. సమ్మెపై కార్మిక సంఘాలు వివరణ ఇచ్చాయి. మరోవైపు, ప్రజలకు ఇబ్బంది లేకుండా ప్రత్యామ్నాయ ఏర్పాట్లు చేశామని ప్రభుత్వం న్యాయస్థానానికి తెలిపింది. అంతేకాదు కార్మికుల సమ్మె చట్ట విరుద్ధమని కోర్టుకి తెలిపింది. ఈ సందర్భంగా కోర్టు జోక్యం చేసుకుని బస్ పాస్ హోల్డర్స్‌ను ప్రయాణానికి అనుమతి ఇస్తున్నారా అని ప్రశ్నించింది. ఇప్పటికే అన్ని డిపో మేనేజర్లకు ఆదేశాలు ఇచ్చామని ప్రభుత్వం పేర్కొంది.

అయితే, మరోసారి పూర్తి వివరాలతో నివేదిక అందజేయాలని ప్రభుత్వం, ఆర్టీసీ యాజమాన్యాన్ని హైకోర్టు ఆదేశించింది. అంతేకాదు, ప్రభుత్వం దాఖలు చేసీన కౌంటర్‌పై అసంతృప్తి వ్యక్తం చేసింది. వాదనలు విన్న ధర్మాసనం ప్రభుత్వ నివేదిక అస్పష్టంగా ఉందని అభిప్రాయపడింది. తదుపరి విచారణను అక్టోబరు 15కు వాయిదా వేసింది. ఆర్టీసీ కార్మికుల తరఫున తెలంగాణ జనసమితి నేత కోదండరాం, జేఏసీ నేతలు హాజరయ్యారు.

మరోవైపు, ఆర్టీసీ కార్మికులు విధులకు హాజరుకాకపోవడంతో తాత్కాలిక ఉద్యోగులతో బస్సులను నడిపిస్తున్నా ప్రయాణీకులకు ఇబ్బందులు తప్పడంలేదు. గురువారం నుంచి షెడ్యూల్‌ ప్రకారం బస్సులు నడవనున్నట్లు రవాణా మంత్రి పువ్వాడ అజయ్‌‌కుమార్ ప్రకటించారు. కొన్నిచోట్ల టికెట్‌ ధర కంటే ఎక్కువ డబ్బులు తీసుకుంటున్నారనే ఆరోపణలు వెల్లువెత్తడంతో ప్రతి బస్సులోనూ ఛార్జీల పట్టికను ఏర్పాటు చేశారు.

టికెట్‌ ధరకు మించి ఒక్క రూపాయి ఎక్కువ తీసుకున్నా తాత్కాలిక ఉద్యోగులపై చర్యలు తీసుకుంటామని అధికారులు హెచ్చరించారు. బస్‌ పాస్‌ను కూడా అనుమతించనున్నారు.
ఆర్టీసీ సమ్మె జరుగుతున్న నేపథ్యంలో ఈ నెల 19వ తేదీ వరకు తెలంగాణలో విద్యా సంస్థలకు దసరా సెలవులను పొడిగిస్తూ సర్కార్ నిర్ణయం తీసుకుంది.
పండగ ముగియడంతో ప్రజలు సొంతూళ్ల నుంచి రాజధానికి చేరుకుంటున్నారు.......